కొత్త ఏడాది పలకరింపు ఎక్కడ మొదలై.. ఎక్కడ ముగుస్తుందో తెలుసా?

డిసెంబర్ 31న గడియారం ముల్లు రాత్రి 12 గంటలను తాకగానే ప్రపంచం కొత్త ఆశలతో నూతన సంవత్సరానికి స్వాగతం పలుకుతుంది. అయితే, భూభ్రమణం, వేర్వేరు టైమ్ జోన్ల కారణంగా ఈ వేడుకలు ప్రపంచవ్యాప్తంగా ఒకే సమయంలో జరగవు. పసిఫిక్ దీవుల నుంచి మొదలుకొని అమెరికా వరకు ఈ సంబరాలు దాదాపు 24 గంటల పాటు అంచెలంచెలుగా సాగుతాయి. మరి ఈ కొత్త ఏడాది పలకరింపు ఎక్కడ మొదలై, ఎక్కడ ముగుస్తుందో చూద్దాం.

ప్రపంచంలో అందరికంటే ముందుగా కిరిబాటి దేశంలోని 'కిరితిమతి' ఐలాండ్ (క్రిస్మస్ ఐలాండ్) కొత్త సంవత్సరానికి స్వాగతం పలుకుతుంది. అంతర్జాతీయ దినరేఖకు (International Date Line) పశ్చిమాన ఉండటంతో ఇక్కడ వేడుకలు అందరికంటే ముందుగా మొదలవుతాయి. ఆ తర్వాత వరుసలో న్యూజిలాండ్ ఉంటుంది. అనంతరం ఆస్ట్రేలియాలోని సిడ్నీ హార్బర్ బ్రిడ్జిపై జరిగే భారీ బాణసంచా వెలుగులతో ఆ దేశం కొత్త ఏడాదిలోకి అడుగుపెడుతుంది. 

ఆ తర్వాత జపాన్, దక్షిణ కొరియాలో సంప్రదాయ గంట మోగించడం, బాణసంచా కాల్చడం వంటి ఆచారాలతో వేడుకలు జరుగుతాయి. చైనా, ఆగ్నేయాసియా దేశాల తర్వాత న్యూ ఇయర్ పలకరించేది భారత్‌నే.

గ్లోబల్ కౌంట్‌డౌన్‌లో భారత్ మధ్యస్థంగా ఉంటుంది. మన దేశంలో ఢిల్లీ, ముంబై, బెంగళూరు వంటి మెట్రో నగరాల్లో అర్ధరాత్రి దాకా పార్టీలు జరిగితే, మరికొందరు సంప్రదాయ కుటుంబ వేడుకలతో కొత్త ఏడాదిని ఆహ్వానిస్తారు. భారత్ తర్వాత పశ్చిమాసియా, ఆపై యూరప్ దేశాల్లో వేడుకలు మొదలవుతాయి. లండన్‌లోని బిగ్ బెన్, పారిస్‌లోని ఈఫిల్ టవర్, బెర్లిన్‌లలోని వేడుకలు ఆకట్టుకుంటాయి. 

ఆ తర్వాత అమెరికా ఖండంలోని దేశాలు, న్యూయార్క్ టైమ్స్ స్క్వేర్, బ్రెజిల్ బీచ్‌లలో సంబరాలు మొదలవుతాయి.

అందరికంటే చివరగా న్యూ ఇయర్ జరుపుకునేది అమెరికన్ సమోవా, బేకర్, హౌలాండ్ దీవులు. ఇక్కడ కిరిబాటి కంటే దాదాపు ఒక రోజు (సుమారు 24 గంటలు) ఆలస్యంగా కొత్త సంవత్సరం ప్రవేశిస్తుంది. దీంతో ప్రపంచవ్యాప్తంగా న్యూ ఇయర్ వేడుకల చక్రం పూర్తవుతుంది.